İsrail Ordusu Livan və Qəzzanı bombaladı

İsrail Ordusu Qəzzanı bombalayıb.

Bu dəfə anklavın Rəfah, Xan Yunis şəhərləri, eləcə də Zeytun və digər rayonları hədəf alnıb. Nəticədə üç nəfər həlak olub, daha doqquz nəfər isə yaralanıb.

Bu barədə "Al Jazeera"yə səhiyyə sistemindəki mənbələr bildirib.

Məlumata görə, İsrail təyyarələri həmçinin anklavın mərkəzində yerləşən Bureyc qaçqın düşərgəsinin şərq hissəsində, eləcə də Qəzzanın şimalındakı Cəbaliya və Beyt-Lahiyada bir neçə əraziyə zərbələr endirib. 

İsrail Ordusu Livanın cənubunda "Hizbullah" təşkilatının hərbi infrastruktur obyektlərini də atəşə tutub.

"Zərbələr Cənubi Livanda təşkilata məxsus bir neçə hərbi obyektlərdə silah saxlamaq üçün istifadə olunan şaxtalara endirilib. Son aylarda həmin obyektlərdə "Hizbullah"ın fəaliyyəti qeydə alınıb. İsrail Müdafiə Qüvvələri dövlət qarşısında yaranan hər hansı təhdidi aradan qaldırmaq üçün tədbirlər görməyə davam edəcək", – deyə ordunun mətbuat xidmətinin yaydığı açıqlamada qeyd olunub.

İsrail tərəfinin mövqeyinə görə, bu obyektlərdəki fəaliyyət İsrail və Livan arasında atəşkəs razılaşmalarının pozulmasına xidmət edir.